"Jangan menghina biar di hina kerana sehina-hina orang yang dihina lebih hina yang menghina"

MUTAKHIR

.

Wednesday, September 1, 2010


Dibulan poso ni ambo tengok ramai hok laeh... nak buat kerja berat pun nampok malas. Kebanyok key gak dok tidur...Kes nyo takut letih, nok wak guano mugo poso belako. Budok -budok krijo pun napok malah jah, nok lipat kain pun malas. Takpo lah ambo bui can ko demo. Ambo pehe doh kalu bule poso gak lagu lah belako(perang pyscology). Tapi ambo royak betul.., ambo dok leh dok diam, kalu dok diam sero nok demey. sebak tu kot-kot mano pun ambo keno tubik jugok riadah walaupun 1 je. Kalu dulu bule-bule poso ni ambo gi aerobik..setengoh ore tu gi main bola, tapi loni kawe riding pulop. Duo-duo aktiviti tu serupo jah, tujuan utamo nok wi peluh. Biar daroh jale. Paling lamo kawe bulih 'oak' 3hari, masuk hari ke 4 mula raso nok demey. Start lah panas sejuk tu. Jadi dari dok tele ubat demey baik ambo naik kudo.


Bule poso ni selang sari ambo riding. Lepas asar naik kudo 1jam 30min. Hasilnya ambo lost weight 2kg dale bule poso ni. Dok payoh makey ubat kuruh doh.. Ramai lah hok dok tawar ubat kuruh tu. Teh kurus lah, kapsul kuruh lah mace-mace ado. Terliur jugok ubat kuruh tu. Dok leh lari doh ore tino. Nok napok comey sokmo di mato suami. Tapi bila ado altenatif lain untuk kurus bakpo keno pilih ubat kuruh deh. Padey denge naik kudo bulih lost weight gitu-gitu mo.. Dok cayo acu try. Bule poso naik kudo. Aci angkat ibu jari. Tapi ingat time buko jangan telan nasi banyak. Padey jeling-jeling gitu jah ko nasik tu. Minum air suam, tok soh dok teliur lah ko air batu tu. Kalu ikut petuo ni insyaALLAH jadi.


Hok mano-mano napok nok maju kedepan tu keno cepat-cepat ikhtiar jange dey terus maju. Sek-sek kudo ni kalu bule dok poso hari-hari riding. tapi bunyi jah poso selendar selalu dok leh gi. Pah nok gi endurance guano? acu try naik kudo bule poso retek gak. Kalu dago sikit pun "Oak" lah. Tanyo sore dok.. tanyo duo dok.. paka dok belako. Doh demo dok rok gak ambo Dok pakso. Hehehe..
 

Kito ni akhir ramadhan doh..Check balik amalan kito selamo sebulan berpuasa. Jange jadikan amalan kito selama sebule tu sia-sia. Semogo ALLAH swt pandang dan tengok usaha kito semuo. Diharap kito semuo jupo pulop ramadhan tahun depey. Akhir kata ambo memohon maaf kalu ado silap & saloh, terkasar bahaso, dok leh kiro dale dok menulis ni ada perkataan & ayat ambo yang menguris hati pembaco. Maaflah kalu ambo dok perasaan. Selamat menyambut hari rayo aidilfitri kepada semua kawan-kawan esp sek-sek kudo kito tu. Ado jodoh jumpo pulop bilo ada acara berkudo lagi deh!. Wassalam.

1 comment:

mod said...

taqabbalallah minna wminnik..

segho dok klate jah bilo kak kitun tulih entry gining..

=)